ភ្នំពេញ៖ នាយករដ្ឋមន្ត្រីជប៉ុន លោក ស៊ីដា ហ្វូមីអូ បានប្រកាសថាជប៉ុននឹងនៅតែបន្តគាំទ្រជួយដល់ការបោះឆ្នោតនៅកម្ពុជាដើម្បីឈរបញ្ចាំងពីមតិចម្រុះនៅក្នុងប្រទេសនេះ។

ថ្លែងនៅក្នុងសន្និសីទសារព័ត៌មាននាយប់ថ្ងៃទី២០ ខែមីនា ឆ្នាំ២០២២នេះ លោក ស៊ីដា ហ្វូមីអូ បានបញ្ជាក់អំពីការគាំទ្រដល់ លទ្ធិប្រជាធិបតេយ្យនិងសិទ្ធិមនុស្សនៅកម្ពុជាដោយប្រកាសក្នុងការចូលរួមជាមួយនឹងរាជរដ្ឋាភិបាលកម្ពុជាដើម្បីគាំទ្រដល់វិស័យទាំងនេះ។ ខណៈដែលកម្ពុជានឹងរៀបចំការបោះឆ្នោតនៅឆ្នាំ២០២២ និងឆ្នាំ២០២៣ លោកបានប្រកាសថា រដ្ឋាភិបាលជប៉ុននឹងនៅតែបន្តគាំទ្រដល់ការបោះឆ្នោតនៅកម្ពុជានេះបន្តទៀត។

លោកថា៖ «ជប៉ុនបន្តគាំទ្រដល់កម្ពុជាឲ្យបោះឆ្នោតបានដើម្បីឆ្លុះបញ្ចាំងពីមតិចម្រុះនៅកម្ពុជា»។

នៅក្នុងឆ្នាំ២០២២ នេះព្រះរាជាណាចក្រកម្ពុជានឹងរៀបចំការបោះឆ្នោតជ្រើសរើសក្រុមប្រឹក្សាឃុំសង្កាត់នៅថ្ងៃទី៥ ខែមិថុនា ឆ្នាំ២០២២ ដែលមានគណបក្សនយោបាយចំនួន១៧ ចូលរួមក្នុងការបោះឆ្នោត ខណៈនៅឆ្នាំ២០២៣ ខាងមុខការបោះឆ្នោតថ្នាក់ជាតិជ្រើសរើសសមាជិកសភាសភានឹងរៀបចំឡើង៕